Minisitiri w’Intebe yasabye amadini kubyaza umusaruro icyizere afitiwe n’abayoboke bayo

0
212

Minisitiri w’Intebe, Dr Ngirente Edouard, yasabye amadini gukoresha neza icyizere abayoboke bayo bayafitiye mu gukemura ibibazo binyuranye byugarije Umuryango Nyarwanda.

Yabigarutseho kuri uyu wa Gatandatu mu muhango wo gutaha Kiliziya nshya ya Katederali ya Kibungo no kuyegurira Imana ndetse no gutangiza umwaka wa Yubile y’imyaka 50 Diyosezi ya Kibungo imaze ishinzwe.

Minisitiri w’Intebe yashimiye ubufatanye bwa Kiliziya Gatolika na Guverinoma y’u Rwanda, mu guharanira imibereho myiza y’abaturage, kuko uretse kwigisha ivanjiri inabigisha kurushaho kugira ubuzima bwiza, guteza imbere ubuhinzi n’ubworozi, kurwanya imirire mibi, ubuvuzi, uburezi n’ibindi.

Agendeye ku ibaruwa ya Mutagatifu Yakobo no ku rugero rwiza rw’abakirisitu ba Kibungo biyubakiye Kiliziya igezweho, Minisitiri w’Intebe, Dr Ngirente, yavuze ko ntacyo byaba bimaze kuba umuntu yavuga ko afite ukwemera ariko adafite ibikorwa.

Yashishikarije amadini kurushaho kwegera abayoboke bayo no kubatoza kwitabira ibikorwa bibafasha kwiteza imbere.

Yagize ati “Amadini akoresheje neza icyizere abakirisitu bayafitiye byagabanya mu buryo bugaragara ibibazo byugarije umuryango nyarwanda birimo abana bata ishuri, isuku nke, ibiyobyabwenge, ubwitabire muri gahunda y’ubwisungane mu kwivuza n’ibindi.”

Kiliziya nshya ya Paruwasi Katederali yisunze Mutagatifu Andereya ya Kibungo, isumbye iyari isanzwe ku kigero cya 85%, ikaba yakwakira abantu 2000 bicaye neza, ifite umunara wa metero 24 z’ubutumburuke nk’ikirango cy’abazajya bashaka kuhasengera. Nubwo itaruzura neza, imaze gutwara miliyoni 436 519 347 z’amafaranga y’u Rwanda.

Padiri Mukuru w’iyi Katederali, Murinzi Didas, yavuze ko umushinga wo kubaka iyi Kiliziya wari warahoze mu bitekerezo kuko iyari ihari yari yarateye ururondogoro abayibonaga bose ndetse nabo bikabatera ipfunwe.

Umushumba wa Diyosezi ya Kibungo, Musenyeri Antoine Kambanda, yashimiye abakirisitu n’abagiraneza batumye umushinga wo kubaka Kiliziya watangiye mu 2014 urangira.

Yagize ati “Imana yateye urukundo rukomeye mu bakirisitu bacu baritanga batizigama bituma tugera kuri iki gikorwa. Nubwo diyosezi yari ifite ibibazo by’ubukungu, abakirisitu n’inshuti za diyosezi bagize uruhare rukomeye cyane.”

Abakrisitu ba paruwasi batanze miliyoni zirenga 186, diyosezi binyuze mu nshuti zayo no mu miryango yo gushyigikira iyogezabutumwa yashinzwe na Papa, yatanze miliyoni zirenga 256, naho inguzanyo itarishyurwa ikaba ari miliyoni 74 z’amafaranga y’u Rwanda.

Ibyishimo bidasanzwe mu bakirisitu

Kugira ngo iyi katederali yubakwe yuzure neza buri mukiristu yasabwe gutanga inkunga y’amafaranga y’u Rwanda ibihumbi 30 mu byiciro bitandukanye.

Ntambiruhari Jean de la Croix umukirisitu wo muri Katederale ya Kibungo umaze gutanga umusanzu w’ibihumbi 17, akaba asigaje ibihumbi 13, yishimiye ko batazongera gusengera muri Kiliziya igayitse, irimo ubucucike n’ibindi bitagezweho.

Ati “Dufite ibyishimo byo gutaha Paruwasi Katederale yacu. Iya mbere yari mbi cyane iriho amabati ya fibre-ciment hari ubucucike bwinshi ku buryo habaga misa nibura eshatu. Ubu dufite ibyishimo byinshi cyane kuko iyi Kiliziya yacu igendanye n’igihe kandi tukaba tubona ari iya mbere muri Ngoma rwose turabyishimiye.”

Mukabarisa Elemerinda wo muri santarari ya Kazo, yishimiye ko ingufu batanze zibyaye umusaruro wa Kiliziya nziza izabafasha kwitagatifuza nta mbogamizi n’imwe bahuye nayo.

Yagize ati “Urebye uko Paruwasi yari imeze yari isebetse, ariko ubu twatanze ingufu zikomeye kugira ngo iyi paruwasi tuyigereho. N’umwenda umuntu yarekaga kuwambara kugira ngo tuyitahe uyu munsi. Iya mbere yari ishaje birengeje ukwemera ntabwo yari ijyanye n’igihe tugezemo arik0 iyi ijyanye n’igihe tugezemo.”

Diyosezi ya Kibungo kandi yinjiye mu mwaka wa Yubile y’imyaka 50 imaze ishinzwe na Papa Pawulo wa VI mu mwaka wa 1968. Ifite Paruwasi 18, abasaseridoti 93, abakirisitu 365 358, ingo z’abihayimana 27, ibigo nderabuzima, amashuri gatolika n’ibindi bikorwa bibungabunga ubuzima bwa muntu mu iterambere ry’umubiri nkuko ikinyamakuru Igihe kibitangaza.

 

Minisitiri w’Intebe, Dr Ngirente Edouard, yasabye amadini gukoresha neza icyizere abayoboke bayo bayafitiye mu gukemura ibibazo
Minisitiri w’Intebe, Dr Edouard Ngirente yitabiriye umuhango wo gutaha iyi katederali ari kumwe na Minisitiri w’Ubutegetsi bw’Igihugu, Francis Kaboneka
Iyi Kiliziya ifite umunara wa metero 24 z’ubutumburuke nk’ikirango cy’abazajya bashaka kuhasengera

Facebooktwittergoogle_plusredditpinterestlinkedinmail

SIGA IGITEKEREZO CYAWE KURI IYI NKURU ::