Musenyeri Nzakamwita yabwiye urubyiruko ko agakingirizo katarinda icyaha

0
790

Musenyeri wa Diyosezi ya Byumba, Sylverien Nzakamwita, yasabye urubyiruko rwo muri Kiliziya Gatolika kureka ubusambanyi burwugarije kandi bakamenya ko gukoresha agakingirizo bitarinda icyaha.

Ibi yabigarutseho kuri iki Cyumweru tariki ya 7 Mutarama 2018, ubwo yatangizaga ihuriro ry’urubyiruko rusaga 5000 rwa Kiliziya Gatolika mu Rwanda, rizamara iminsi itanu ribera muri Diyosezi ya Cyangagu.

Musenyeri Nzakamwita, Umushumba wa Diyosezi ya Byumba akaba na Perezida wa komisiyo ishinzwe iyogezabutumwa mu rubyiruko, yavuze ko urubyiruko rukwiye kureka ubusambanyi kuko bugira ingaruka nyinshi mbi ku mibereho yarwo ndetse ababwira ko agakingirizo katarinda icyaha.

Ati “Iki gihugu cyacu kirifuza kubakura mu bukene ariko mubigizemo uruhare mukirinda ibibayobya, mukirinda kurya ibidakwiye, kurya ibitaribwa. Hari imbuto batubwira ko zitaribwa; namwe nagira ngo mbabwire imbuto mugomba kwirinda, ni ubusambanyi kuko nimuyirya muzapfa, muzahura ni’ibibazo kandi kubyikuramo bibagore.”

“Muzahura n’inda zitateguwe. Abahuye na zo bafite ibibazo bikomeye kandi muzahura n’indwara zirimo na Sida. Ntibazababeshye ngo umuti ni agakingirizo, agakingirizo ntigakingira icyaha, ubusambanyi ni icyaha.”

Rumwe mu rubyiruko rwemera ko gukoresha agakingirizo ari icyaha kubera imyemerere ariko rukemeza ko uwaba yaguye muri icyo cyaha cy’ubusambanyi akwiye kugakoresha kugira ngo areke kwandura indwara zandurira mu mibonano mpuzabitsina.

Ndekezi Ephrem ati “ Ubutumwa bwa Musenyeri ndabushyigikiye kuko ntabwo wabwira urubyiruko ngo rukoreshe agakingirizo; icya mbere uba ubabwiye ngo musambane kandi gusambana mu nyigisho dufite ni icyaha. Ukoresha agakingirizo urinda umubiri ariko nturinda roho. Ushobora gukomeza guhatiriza kugeza ubwo utsinze kamere kandi birashoboka ariko uwo byananiye yagakoresha akamenya ko ari hanze ya kiliziya nubwo ari gufasha ubuzima bwe.”

Iri huriro ryitabiriwe n’urubyiruko ruturutse muri diyosezi zose zo muri Kiliziya Gatolika mu Rwanda. Abaryitabira baganira ku bibazo byugarije urubyiruko; kuri iyi nshuro ya 14 bazibanda ku bikorwa byo kurwanya ibiyobyabwenge nkuko Igihe dukesha iyi nkuru kibitangaza.

Abakirisitu n’urubyiruko Gatolika ruturutse mu turere dutandukanye bari bitabiriye iri huriro
Musenyeri Nzakamwita yasabye urubyiruko kwirinda ubusambanyi bazirikana ko gukoresha agakingirizo bitarinda icyaha
Abayobozi mu nzego zitandukanye bari bitabiriye umuhango wo gutangiza iri huriro ry’urubyiruko

Facebooktwittergoogle_plusredditpinterestlinkedinmail

SIGA IGITEKEREZO CYAWE KURI IYI NKURU ::