Friday , 22 September 2017

Ntabwo Imana yaturemeye kuba abatindi – Kagame Paul

Umukandida wa FPR-Inkotanyi, Kagame Paul, kuri iki Cyumweru yakomeje ibikorwa bye byo kwiyamamariza kuyobora u Rwanda mu myaka irindwi iri imbere, aho yabwiye abaturage b’Akarere ka Huye ko Imana itaremeye abanyarwanda kuba abatindi cyangwa abakene.

Uyu munsi Kagame yiyamamarije mu turere twa Nyamagabe, Huye na Kamonyi. Mu mpanuro yagejeje ku barenga ibihumbi 100 bakoraniye mu kibuga cy’imbere ya Sitade Huye, yavuze ko ibi bihe by’amatora ari ukunoza inzira abanyarwanda basanzwemo yo gukorera hamwe no gukora ibyiza.

Yagize ati “Inzira turimo, inzira dusanzwemo ni ukuyinoza uko bisanzwe tugakora, tugakorera hamwe tugakora ibyiza, tukikorera, ntawe dusiganya, ntidusigana turakora nk’abikorera.”

Mu myaka irindwi ishize Akarere ka Huye kishimira ko hubatswe imihanda, Stade ya Huye yakiriye imikino ya CHAN, amahoteli, amashanyarazi n’amazi byagejejwe ku baturage n’ibindi bikorwa by’itermbere.

Chairman akaba n’umukandida wa FPR-Inkotanyi, Kagame Paul, yavuze ko abanyarwanda bagize amateka arimo kubatandukanya ariyo mpamvu uyu muryango ukomeje gushyira imbera umuco wo kubaka amajyambere, umutekano n’ubumwe bidaheza.

Yagize ati “Ubu turubaka amateka y’umutekano, amajyambere, ubumwe byose bitagira ubihezwamo. Turajyana ntawe dusiga inyuma, ibyo rero ni umuco FPR yadutoje, ni umuco abanyarwanda bose bamaze kwitabira dukwiye gukomeza kwitabira, nibyo bizatugeza kure.”

Yakomeje avuga ko abanyarwanda bashaka kwihuta mu iterambere bakagera kure kandi buri wese akabigizemo uruhare kuko aribyo bibabereye. Ibi bakazabigeraho nk’uko n’abandi babigezeho kuko Imana itabaremeye gukena.

Ati “Ntabwo Imana yaturemeye kuba abatindi, kuba abakene, ntabwo aricyo Imana yaturemeye. Hari ujya abyiyumvamo, abandi se bageze kure mu iterambere uribwira ngo Imana yarababereye kurusha uko ikunda u Rwanda, ntabwo ari byo.”

Igihe.com ducyesha iyi nkuru gitangaza ko Umukandida wa FPR-Inkotanyi yongeyeho ko u Rwanda ndetse n’igice kinini cya Afurika bikiri inyuma kubera politiki mbi n’amateka yabyo. Gusa ngo aya matora ni imwe mu nzira zo kuva muri ayo mateka mabi hubakwa ameza.

Yakebuye urubyiruko

Kagame yavuze ko mu myaka 23 ishize yo kubaka u Rwanda rushya, urubyiruko rwitaweho kuko arizo ngufu z’igihugu cy’ubu n’ejo hazaza. Yasabye urubyiruko kubyaza umusaruro aya mahirwe kuko aboneka rimwe.

Yagize ati “Amahirwe rero arahari, icyangombwa ni uguhitamo kuyafata ukayakoresha neza. Amahirwe iyo utayakoresheje andi akaza ntuyakoreshe ubutaha urayategereza ntuyabone, ariko iyo ukoresha amahirwe ufite n’andi araza.”

Ntucikwe !! Horana   natwe ukanda hano   like kuri page   yacu ya  Facebook,  Twitter  na  YouTube    ukande subscribed   kugira ngo umenye amakuru agezweho buri kanya unareba amavidewo y’indirimbo zihimbaza Imana , n’ibiganiro by’abakozi b’Imana ugezwaho na Ibyishimo.com.

 

 

Rurangwa  Aimable

588 total views, 1 views today

Facebooktwittergoogle_plusredditpinterestlinkedinmail

Leave a Reply

Your email address will not be published. Required fields are marked *

*

Facebook

Get the Facebook Likebox Slider Pro for WordPress