RDC: Abasenyeri Gatolika basabye Perezida Kabila gusezeranya abaturage ko ataziyamamaza mu 2018

0
798

Abasenyeri ba Kiliziya Gatolika muri Repubulika Iharanira Demokarasi ya Congo, basabye Perezida Joseph Kabila, kwizeza abaturage ko ataziyamamariza manda ya gatatu mu matora ya Perezida ateganyijwe mu mpera z’umwaka utaha, mu rwego rwo kubizeza amahoro no kutongera kubona imvururu.

Umwaka ushize, abihayimana Gatolika bagize uruhare mu biganiro byahuzaga leta n’abatavuga rumwe byemeje ko amatora yagombaga kuba bitarenze uyu mwaka, ariko siko byagenze kuko Komisiyo y’amatora yatangaje ko harimo ibibazo bijyanye no gutunganya lisiti y’itora bituma yimurirwa mu 2018.

Nyuma y’inama idasanzwe yigaga kuri iki kibazo abihayimana bagize kuri uyu wa Mbere, basabye Perezida Kabila kwizeza rubanda ko atazagaragara ku rutonde rw’abiyamamariza kuyobora iki gihugu mu matora ya 2018, kuko byatuma imvururu zihasanzwe n’ubundi zamagana ubuyobozi bwe zikaza umurego nk’uko Daily Monutor yabitangaje.

Itegeko Nshinga rya Congo, rigaragaza ko Kabila wagiye ku butegetsi mu 2001, asimbuye se, agatorerwa manda ya mbere mu 2006, iya kabiri yatorewe mu 2011 ikarangira mu 2016, atakongera kwiyamamaza kuko rimuha uburenganzira bwo kwiyamamariza manda ebyiri gusa.

Abo bihayimana kandi basabye Leta ya Congo kugaragaza neza ingengo y’imari y’amatora no guteganyiriza imfungwa z’intambara ndetse n’abari mu buhungiro uburyo bwo kuzatora.

Perezida Joseph Kabila aganira na Papa Francis

Facebooktwittergoogle_plusredditpinterestlinkedinmail

SIGA IGITEKEREZO CYAWE KURI IYI NKURU ::