Umwana wavaga amabuye mu maso no mu gitsina yatangiye koroherwa nyuma yo gusengerwa

0
54

Umwana w’imyaka icyenda wo mu Kagari ka Pera, Umurenge wa Bugarama mu Karere ka Rusizi, warwaye indwara yabaye amayobera yo kuva amabuye mu maso no mu gitsina, yatangiye kugarura agahenge nyuma y’iminsi ajyanywe mu banyamasengesho.

Uyu mwana wiga mu mwaka wa Gatatu w’amashuri abanza mu Rwunge rwa Mutagatifu Paul Muko, yafashwe n’iyo ndwara ari mu ishuri guhera ku wa Kabiri, tarikiya 14 Kamena 2017.

Kuva icyo gihe abaturanyi b’uyu muryango na bo baguye mu kantu nyuma yo kubona uburwayi bwe ndetse benshi batangira no gukeka imbaraga z’amarozi.

Uwabato Théodosie yagize ati “Nasanze umwana nk’ako kanya nkicara mba mbonye ibuye risohotse mu maso, nabibonye ntabwo ari inkuru mbarirano, dukeka ko ari amarozi.”

Ku ikubitiro abarera uyu mwana bagerageje kumuvuza ariko ntibyagira icyo bitanga gusa muri iyi minsi yongeye kugarura agahenge nyuma yo kumujyana mu banyamasengesho.

Inkuru y’umwana wariraga amabuye yacicikanye mu gihugu hose muri Kamena byanatumye umunyamakuru wa IGIHE yongera gusura umuryango we maze Mukarugwiza Marie Thérèse umurera asobanura uko abayeho muri iki gihe.

Mukarugwiza umaranye amezi abiri n’uyu mwana yavuze ko iki kibazo nyuma cyakomeye kugeza ubwo bamujyanye mu bitaro bya Mibirizi na Bushenge.

Yagize ati “Byaje kugeraho biba bibi cyane, bya bindi by’amabuye mu maso no mu gitsina birahagarara noneho haza ikintu mu nda, kikabyimba cyane ndetse kigatimbaguza kigeraho kiragenda. Nyuma yaho mu nzara z’amano no mu maso hatangira kuvamo ibiryasukari bimeze nk’ibimonyo kandi bigahita bitembera.”

Yafashe icyemezo cyo kwitabaza abanyamasengesho aho yanamaze icyumweru yiyiriza, ajya mu butayu (aho abantu basengera biherereye) bwo kuri Murya ndetse aza no kwitabaza umunyabitangaza Padiri Ubald nkuko IGIHE yabyanditse.

Yagize ati “Nta na rimwe twacogoye kuko twarasengaga buri munsi. Hari igihe yamaraga nk’umunsi nta kibazo afite ariko hashira nk’itatu ya mabuye akagaruka. Ubu amaze iminsi ibiri nta kibazo afite.”

Abaganga na bo bemeje ko nta kibazo afite bamwohereza gukurikiranwa ari mu rugo. Yagize ati “Mu rwego rwo gukurikirana ubuzima bw’umwana twamujyanye mu Bitaro i Mibirizi babura indwara; bamwohereje no mu bya Bushenge basanga ni muzima bahita bafata icyemezo cyo kumwohereza mu rugo.”

Mukarugwiza yatangaje ko agahenge bafite bakavanye mu kwiyambaza Imana muri ibi bihe bigoye yizeye ko Imana izakiza uyu mwana ufite uburwayi bwakomeje kuba amayobera.

Aya ni amabuye yavuye mu maso y’uyu mwana
Aya ni amabuye yavuye mu myanya ndangagitsina y’uyu mwana

Ntucikwe !! Horana   natwe ukanda hano  like kuri page   yacu ya  Facebook,  Twitter  na Youtube    ukande subscribed   kugirango umenye amakuru agezweho buri kanya unareba amavidewo y’indirimbo zihimbaza Imana , n’ibiganiro by’abakozi b’Imana ugezwaho na Ibyishimo.com.

 

 

Donat Niyitanga

Facebooktwittergoogle_plusredditpinterestlinkedinmail

SIGA IGITEKEREZO CYAWE KURI IYI NKURU ::