Urukiko rwasabwe gutesha agaciro ikirego kiregwamo Musenyeri Ntihinyurwa

0
1861

Umwunganizi w’Umushumba wa Arkidiyosezi ya Kigali, Musenyeri Ntihinyurwa Thaddée, warezwe mu Rukiko Rwisumbuye rwa Nyarugenge ashinjwa kugira uruhare mu guca umuco gakondo mu Rwanda; yasabye ko ikirego giteshwa agaciro kuko Manirareba Herman nta bubasha afite bwo kurega.

Musenyeri Ntihinyurwa ntiyagaragaye mu rukiko gusa yari ahagarariwe na Me Ndengeyingoma Yvonne watangiye asaba Urukiko Rwisumbuye rwa Nyarugenge, gutesha agaciro ikirego cya Manirareba Herman, kuko nta bubasha bwo kurega afite ndetse n’uwo arega akaba nta bubasha bwo kuregwa afite.

Me Ndengeyingoma yavuze ko urukiko rudakwiye kwakira ikirego kuko Manirareba nta bubasha afite bwo kurega mu izina ry’abanyarwanda bose.

Mu miterere y’ikirego, Manirareba avuga ko kuwa 29 Kamena 2001 Musenyeri Ntihinyurwa afatanyije na bagenzi be barimo Musenyeri Misago Augustin wayoboraga Diyoseze ya Gikongoro, bemeje ko uwabonekeye i Kibeho kuva ku itariki ya 28 Ugushyingo 1981 kugeza kuya 28 Ugushyingo1989 “ari Bikiramariya Nyina wa Yezu kandi ari Nyirarumaga wabyaye Ruganzu II Ndoli mu buryo bwa mwuka wari waje kubwira Abanyarwanda ko mu gihugu cyabo hazabaho Jenoside kugira ngo bayirinde.”

Mu myanzuro Manirareba yashyikirije Urukiko rwisumbuye rwa Nyarugenge, arusaba gutesha agaciro icyemezo cy’amabonekerwa y’i Kibeho hakemezwa ko uwabonekeye abakobwa bavugwa atari Bikira Mariya nyina wa Yezu, ahubwo ari Nyirarumaga.

Umwunganizi wa Musenyeri Ntihinyurwa yagize ati “Dusanga Herman atagaragaza icyangombwa kimuha ububasha bwanditse bumwemerera guhagararira abanyarwanda bose.”

Yakomeje agira ati “Uregwa Musenyeri Ntihinyurwa nta bubasha afite bwo kuregwa kuko ibyo urega avuga yakoze atabikoze mu izina rye ahubwo byakozwe mu izina rya Kiliziya […] Dushingiye ku iburabubasha, turasaba urukiko kutakira iki kirego ngo gisuzumwe.”

Urukiko rwahaye umwanya Manirareba Herman ngo yisobanure, avuga ko ububasha bwo kurega Musenyeri abukomora ku kuba ari Umunyarwanda, no kuba abihabwa n’Itegeko Nshinga riha umunyarwanda uburenganzira ku guteza imbere umuco w’igihugu n’inshingano zo kuwuteza imbere. Ati”Umenya umwunganizi wa Musenyeri atashishoje neza.”

Akomeza agira ati “Ntabwo kurega Ntihinyurwa namwibeshyeho, nabitekerejeho igihe kirekire nakoze n’ubushakashatsi burebure bunyereka ko ari we ngomba kurega.”

Manirareba yongeraho ko kurega Ntihinyurwa ari uko yari Perezida w’inama y’Abepiskopi akaba n’Umuvugizi wa Kiliziya, avuka i Kibeho, ndetse afatwa nk’igishyitsi ntayegayezwa cya Kiliziya mu Rwanda.

Umwanzuro uzafatwa ku wa 30/11/2017.

Ikinyamakuru Igihe.com dukesha iyi nkuru cyatangaje ko Manirareba asaba indishyi ku Batutsi 1,074,017 bishwe muri Jenoside yakorewe Abatutsi, buri umwe akamusabira 400 000 $ akanabikuba 2017, bikangana na $866.516.915.600.000.

Anasaba indishyi ku banyarwanda miliyoni 12 kubw’ibikomere batewe na Jenoside yakorewe Abatutsi mu 1994, buri umwe akamubarira 400 000 $, akabikuba 2017 bingana na $9.681.600.000.000.000.

Umushumba wa Arkidiyosezi ya Kigali, Musenyeri Ntihinyurwa Thaddée

 

Manirareba asaba ko ibirori byo muri Kamena, umuganura wo muri Nyakanga, kuraguza, kubandwa no guterekera abakurambere b’Abanyarwanda, byongera gukorwa mu Rwanda

 

Facebooktwittergoogle_plusredditpinterestlinkedinmail

SIGA IGITEKEREZO CYAWE KURI IYI NKURU ::